Тадбиркорлар ва ТИФ
иштирокчилари учун доимий
ишонч телефони
11-08
Божхоначилар Тошкент халқаро аэропортида ноёб судралиб юрувчи жонзотларни олиб чиқишга уринган шахсни тўхтатиб қолишди
613
Ўзбекистон Республикасининг “Ҳайвонот дунёсини муҳофаза қилиш ва ундан фойдаланиш тўғрисида”ги Қонунига биноан ёввойи ҳайвонларни ва уларнинг қисмларини Ўзбекистон Республикасидан олиб чиқиш экология ва атроф-муҳитни муҳофаза қилиш органлари берадиган рухсатномалар асосида амалга оширилади. Ғайриқонуний равишда олиб чиқишга уриниш чоғида ушлаб қолинган ёввойи ҳайвонлар ва уларнинг қисмлари белгиланадиган тартибда олиб қўйилади.
 Божхоначилар Тошкент халқаро аэропортида ноёб судралиб юрувчи жонзотларни олиб чиқишга уринган шахсни тўхтатиб қолишди

Давлат божхона хизмати органлари нафақат мамлакатимизнинг иқтисодий хавфсизлигини, балки ҳайвонот ва ўсимликлар оламини ҳам ҳимоя қилишда ўзларининг муносиб ҳиссаларини қўшиб келмоқдалар. Хусусан, Ўзбекистон Республикасининг Қизил китобига киритилган ноёб жонзотларнинг божхона чегаралари орқали яширин равишда олиб чиқилишига доир қонунбузарлик ҳолатларига ўз вақтида чек қўйилмоқда.

Яқинда «Тошкент-Аэро» ихтисослаштирилган божхона комплексининг «Тошкент халқаро аэропорти» чегара божхона пости ходимлари йўқ бўлиб кетаётган камёб турлар сирасига кирувчи судралиб юрувчи ҳайвонларни ҳаво йўллари орқали яширинча олиб чиқилишига чек қўйишди.

Гап шундаки, “Тошкент-Москва” рейси бўйича парвозга шайланган фуқаролардан бири божхонадан яшил йўлак орқали ҳаракатланар экан, унинг безовталаниши божхоначиларнинг диққатини тортди. Унга тегишли багажлар белгиланган тартибда кўздан кечирилганида эса, шубҳалар ўз тасдиғини топди.

Қарангки, ушбу шахс божхона ходимларининг оғзаки сўровида ва йўловчи божхона декларациясида маълум қилмасдан туриб, тақир тўгаракбош, гекконча, калтекасак каби 35 бош ноёб жонзотларни тирик ҳолатда тамаки қутилари ичига жойлаганча олиб чиқаётган вақтида тўхтатиб қолинди.

Бундан ташқари шу каби жонзотларнинг 14 таси спиртда қотирилган ҳолатда, шунингдек 16 дона калтакесак думи, 1 дона ондатра думи ва 2 бош ўлик ҳолатдаги чипор илон ҳам олиб чиқиб кетилаётгани маълум бўлди.

Мазкур судралиб юрувчи ҳайвонлар асосан Фарғона водийсида табиатдан ажратиб олинган, лекин йўловчи уларни Ўзбекистон Республикасидан олиб чиқиб кетиш ҳуқуқини берувчи ҳужжатларни божхона ходимларига тақдим қила олмади.

Ҳозирда ушбу жонзотлар Ўзбекистон Республикаси экология ва атроф муҳитни муҳофаза қилиш давлат қўмитасига топширилди. Ҳолат юзасидан эса божхона текширувлари давом эттирилмоқда.    

6.07.2021

Эшитиш учун матнни белгиланг ва ушбу тугмани босинг