Bojxona xodimlari yurtimiz hududidan qora va rangli metall parchalarining noqonuniy olib o’tilishining oldini olish borasida qator chora-tadbirlarni amalga oshirishmoqda.

           Yaqinda, Sirdaryo viloyatining “Sardoba” harakatdagi bojxona posti xodimlari Sayxunobod tumanida harakatlanayotgan “Zil” rusumli yuk mashinasini bojxona nazoratidan o’tkazishganda, fuqaro T. Turdiev 4627 kg. qora metal parchalarini hech qanday hujjatlarsiz noqonuniy ravishda olib ketayotganligi ma’lum bo’ldi. 
           Shunga o’xshash holat Navoiy viloyati bojxona boshqarmasi xodimlari tomonidan ham aniqlandi. Ular “Gaz-5327” rusumli yuk mashinasini bojxona nazoratidan o’tkazishganda, unda fuqaro S.Tilavovga tegishli 2120 kg. qora metall parchalari noqonuniy ravishda olib ketilayotganligi ma’lum bo’ldi.
           Jizzax viloyati bojxona boshqarmasining “Gagarin” bojxona posti xodimlari ham boshqa bir “Zil” rusumli yuk mashinasini bojxona nazoratidan o’tkazishdi va unda 4,5 tonnaga yaqin  qora metall parchalari borligini aniqlashdi. Ammo, yuk egasi A.Xudoyberdiev berilgan savollarga javob topolmay yer chizib qoldi.
           Hozirda yuqoridagi holatlar yuzasidan surishtiruv harakatlari olib borilmoqda.