Mamlakatimizda fermer xo’jaliklarini yetarlicha kimyoviy o’g’itlar bilan ta’minlash, ulardan tejamkorlik bilan va o’z o’rnida foydalanishni yo’lga qo’yish masalasiga xukumat darajasida katta e’tibor berilmoqda. Chunki, dunyo davlatlari boshidan kechirayotgan global moliyaviy inqiroz hisob-kitob bilan ish yuritmaslik, mavjud resurslardan to’g’ri foydalanishni yo’lga qo’ymaslik xo’jalik iqtisodini izdan chiqarishi muqarrar ekanligini isbotlab turibdi.
          Lekin, ming afsuski, qishloq xo’jaligi ekinlarining unumdorligini oshirishga xizmat qiladigan bunday tayyor xomashyoni o’z manfaati yo’lida talon-taroj qiluvchilar, mo’may daromad ilinjida uni pullashni ko’zlovchi shaxslar ham topilib turibdi.
         Yaqinda farg’onalik bojxonachilar boshqa huquqni muhofaza qiluvchi idoralar vakillari bilan hamkorlikda ana shunday kimsalardan birining qing’ir qilmishlariga nuqta qo’yishdi. Farg’ona tumanida fuqaro Q.Madaminovning xonadoni qonunchilikda belgilangan tartibda ko’zdan kechirilganda, u yerda hech qanday hujjatlarsiz saqlanayotgan, O’zbekistonda ishlab chiqarilgan va 57 dona qoplarga solinib qo’shni davlatga olib chiqish uchun tayyorlab qo’yilgan salkam 3 tonna ammiakli selitra yashirilganligi aniqlandi.
        Toshkent viloyati bojxonachilari ham ana shunday hamkorlikdagi tezkor tadbirlardan birida 4 tonna ammiakli selitraning talon-taroj qilinishiga chek qo’yishdi. Bekobodlik S.Nurillaeva xonadonini amaldagi tartiblarga ko’ra ko’zdan kechirish chog’ida topilgan 80 ta qopdagi ushbu mineral  o’g’itlar hech qanday hujjatlarsiz saqlanayotgan ekan.
         Urgutlik Z.Umarova xonadonini qonunchilikda belgilangan tartibda ko’zdan kechirgan samarqandlik bojxonachilar va boshqa huquqni muhofaza qiluvchi idoralar vakillari u yerda 163 dona qopdagi ammiakli selitra mahsuloti   yashirincha saqlanayotganini fosh etishdi. Aniqlanishicha,  7.5 tonna og’irlikdagi ushbu mineral o’g’itlar fuqaro M. Julievga tegishli ekan.
         Sirdaryo viloyati bojxonachilari ham boshqa huquqni muhofaza qiluvchi idoralar vakillari bilan hamkorlikda yirik miqdordagi mineral o’g’itlar kontrabandasiga chek qo’yishdi. Shirin shahridagi J.Shodmonqulovning xonadoni amaldagi qonunchilikka muvofiq ko’zdan kechirilganda salkam       17 tonna mineral o’g’itlar qo’shni davlatga olib chiqish uchun hozirlab qo’yilgani fosh etildi. Hech qanday hujjatlari bo’lmagan ushbu mineral o’g’itlarining qiymati salkam 5 mln. so’mni tashkil qilishi ma’lum bo’ldi.