Respublikamiz bojxonachilari tomonidan naqd valyutani olib o’tish bilan bog’liq amaldagi tartib va me’yorlarni buzgan shaxslarning noqonuniy hatti-xarakatlariga o’z vaqtida chek qo’yilmoqda.

          Qo’shni davlat fuqarosi R.Mireshova Toshkent viloyati “Navoiy” bojxona postidan o’z yurtiga o’tayotib, bojxona bayonnomasida hech qanday xorijiy valyutalarni olib ketmayotganligini qayd etgan edi. Ammo, post xodimlari uni bojxona nazoratidan o’tkazishganda, ayolning yonida 3 ming AQSh dollari, 51 mingga yaqin qozoq tengesi,  70 yevro va 85 ming o’zbek so’mi borligi ma’lum bo’ldi. 
         23 yoshli fuqaro S. Ibragimov ham yonidagi naqd valyutani yashirib yanglishdi. Ushbu shaxs 14 450 AQSh dollarini bojxona bayonnomasida qayd etmasdan olib o’tmoqchi bo’lganda Andijon viloyatidagi “Qorasuv” bojxona posti xodimlari darrov uning shubhali harakatlarini sezib qolishdi va bojxona nazoratidan o’tkazishdi. Oqibatda esa qonunbuzar o’zining qing’ir ishidan pushaymon bo’lishdan o’zga chorasi qolmadi.   
         Hozirda yuqoridagi qonunbuzarlik holati yuzasidan surishtiruv harakatlari olib borilmoqda.