Respublikamizda qishloq xo’jaligi mahsulotlari eksporti uchun barcha qonuniy imkoniyat va shart-sharoitlar yaratib berilgan. Amaldagi qonunchilikka muvofiq bu kabi mahsulotlarning eksporti - mulkchilik shaklidan qat’iy nazar yuridik shaxslar tomonidan amalga oshirilishi belgilab qo’yilgan.
       Shunday bo’lsada, xalqimiz rizqiga xiyonat qilayotgan ayrim “uchar” tadbirkorlar yurtimizda yetishtirilgan sara mahsulotlarni chetga noqonuniy ravishda olib o’tib, mo’may daromad orttirishga urinmoqdalar. Ularning qonunga zid xatti-harakatlariga respublikamiz bojxonachilari tomonidan o’z vaqtida chek qo’yilmoqda va noz-ne’matlar el dasturxoniga qaytarilmoqda.
       Sirdaryolik bojxonachilar Oq oltin tumanida fuqaro F.Turdibekovning xonadonini boshqa huquqni muhofaza etuvchi idoralar vakillari bilan hamkorlikda qonunchilikda belgilangan tartibda ko’zdan kechirishdi. Nazorat vaqtida hovlida turgan “Kamaz”ning yukxonasida 12 tonnadan ortiq anor va xurmo noqonuniy ravishda ya’ni bojxona rasmiylashtiruvidan o’tkazilganligini tasdiqlovchi hujjatlarsiz saqlanayotganligi ma’lum bo’ldi. 
       Namangan viloyati bojxonachilari Yangiqo’rg’on tumanida yukxonasiga salkam 10 tonna xurmo ortilgan “Kamaz”ni to’xtatib qolishdi. Mazkur qishloq xo’jalik mahsulotlarini qayta sotish maqsadida olib ketayotgan fuqaro E.Karimov tadbirkorlik bilan shug’ullanish vakolatini tasdiqlovchi bironta ham hujjatni bojxonachilarga taqdim qila olmadi. Shuningdek, viloyat bojxonachilari tomonidan fosh etilgan boshqa bir “tadbirkor” – S.Jo’raevning boshini egib qolishiga esa noqonuiy olib ketayotgan 11 tonna xurmosi sabab bo’ldi.
      Farg’onalik bojxonachilar “uchar tadbirkor”lardan biri A.Ahmadjonovning noqonuniy xatti-harakatlariga chek qo’yishdi. Gap shunda-ki, qonunbuzar 10 tonnadan oshiq xurmoni “Kamaz” yuk mashinasiga yuklab, aylanma yo’llar orqali respublikamiz hududidan olib chiqmoqchi bo’lgan ekan.
        Bojxonachilar aylanma yo’lda harakatlanayotgan fuqaro R. Mirzamatov boshqaruvidagi “Kamaz” yuk mashinasini boshqa huquqni muhofaza etuvchi idoralar vakillari hamkorligida bojxona nazoratidan o’tkazishdi. Naktijada haydovchining to’g’ri yo’l qolib nega “egri” yo’lni ixtiyor qilganligi oydinlashdi. Ma’lum bo’lishicha, “Kamaz”ga ortilgan salkam 13 tonna xurmoni yuk egasi B.Asanov hech qanday hujjatlarsiz chetga olib chiqib, pullashni ko’zlagan ekan.