Bugungi kunda yurtimizda tashqi iqtisodiy faoliyatni rivojlantirish maqsadida tadbirkorlarga keng imkoniyatlar yaratilgan. Har bir tadbirkor bojxona to’lovlarini to’lagan holda yurtimizga chetdan mahsulot olib kirishi mumkin. Ammo, boj to’lashdan qochadigan tadbirkorlar ham borki, ular o’z qilmishlaridan faqat o’zlari pushaymon bo’lishadi.

         Qoraqalpog’iston Respublikasi bojxona boshqarmasi xodimlari tomonidan o’tkazilgan tezkor tadbir davomida Amudaryo tumanida yashovchi fuqarolar E. Yusupov, A. Jumaniyazov, M. Saydov va T. Avezniyazovlar chegaraga yaqin hududga xorijda ishlab chiqarilgan, umumiy qiymati 9 million so’mlik  28 dona rangli televizorlarni to’plab qo’yganligi aniqlandi. Yuqoridagi kimsalar televizorlarni yurtimizga noqonuniy olib kirmoqchi bo’lishgan ekan.  
       Andijonlik O. Muxtarov bojxona rasmiylashtiruvidan o’tkazilganligini tasdiqlovchi hujjatlari bo’lmagan, qiymati qariyb 2 million so’mlik, Xitoyda ishlab chiqarilgan 15 dona “LG”  televizorlarni aylanma yo’llar orqali yurtimizga olib kirmoqchi bo’lganida Andijon viloyati bojxona boshqarmasi “Teshiktosh” bojxona posti xodimlari tomonidan to’xtatib qolindi.
       Hozirda yuqoridagi holatlar yuzasidan surishtiruv harakatlari olib borilmoqda.