Toshkent viloyati bojxonachilari 3 ta holatda yirik miqdordagi sifati kafolatlanmagan oziq-ovqat mahsulotlari kontrabandasiga chek qo’yishdi.
      Toshkent tumanidagi aylanma yo’llardan birida harakatlanayotgan fuqaro N.Ochilov boshqaruvidagi “Vaz 2106”avtomashinasi bojxona tekshiruvidan o’tkazilganda, unga umumiy qiymati 4.5 mln. so’mdan ziyod 5 xil turdagi oziq-ovqat mahsulotlari hech qanday hujjatlarsiz ortilgani ayon bo’ldi.
        Quyi Chirchiq tumanida esa 3.5 tonnadan ortiq tovuq go’shti ortilgan “Gaz-53”ning safari erta qaridi. Fuqaro G’.Usmonov xorijdan keltirilgan va qiymati 13 mln. so’mdan ortiq ushbu mahsulotlarga tegishli bironta ham hujjatni bojxonachilarga taqdim qila olmadi.
        Farg’onalik bojxonachilar va boshqa huquqni muhofaza qiluvchi idoralar vakillari tomonidan rishtonlik N.Meliboeva xonadoni qonunchilikda belgilangan tartibda ko’zdan kechirilganda, u yerda horijdan keltirilgan 1.5 tonnadan ortiq tovuq go’shti hech qanday hujjatlarsiz saqlanayotgani ma’lum bo’ldi. Qog’oz qutilarga joylangan ushbu mahsulotlarning qiymati 5.3 mln. so’mdan ziyodni tashkil qilar ekan.
        Toshkent shahridagi omborxonalardan birini tegishli tartibda ko’zdan kechirgan bojxonachilar yirik miqdordagi pishloqning noqonuniy saqlanayotganini fosh etishdi. Fuqaro A.Abduvalievga tegishli mazkur omborga 400 ga yaqin qutilarda og’irligi salkam 5.5 tonna pishloq yashirilgan ekan. Bojxona rasmiylashtiruvini tasdiqlovchi hujjatlari bo’lmagan ushbu oziq-ovqat mahsulotining qiymati 76 mln. so’mdan ziyodni tashkil qildi.