Hozir yurtimizda qishloq xo’jaligi mahsulotlari ayni pishib yetilgan payt. Xalqimiz rizqiga xiyonat qilayotgan ayrim kimsalar esa yurtimizda yetishtirilgan noz-ne’matlarni chetga noqonuniy ravishda olib  chiqishga urinmoqdalar. Ularning qonunga zid xatti-harakatlariga respublikamiz bojxonachilari tomonidan o’z vaqtida chek qo’yilib, sara mahsulotlar el dasturxoniga qaytarilmoqda.

Jizzax viloyati bojxonachilari va boshqa huquqni muhofaza qilish idoralari xodimlari hamkorligida o’tkazilgan tezkor tadbir davomida aylanma yo’lda harakatlanayotgan 2 ta “KamAZ” rusumli yuk avtomashinalari to’xtatilib, bojxona nazoratidan o’tkazildi.

Natijada, fuqaro  I. Azimov   24 tonna  kartoshkani E. Qosimov va   T. Abdusoatov boshqaruvidagi “KamAZ”larga yuklabhech qanday hujjatlarsiz qo’shni davlatga olib ketilayotganligi  ma’lum bo’ldi.

Shunga o’xshash holatga Namanganlik bojxonachilar tomonidan ham chek qo’yildi. Fuqaro T. Saidvaqqosov “KamAZ” rusumli yuk avtomashinaga 15 tonna kartoshkani yuklab, aylanma yo’llar orqali qo’shni  respublikaga olib ketayotganda bojxonachilar tomonidan to’xtatib qolindi.

Farg’ona tumani hududidagi aylanma yo’lda harakatlanayotgan xorijlik fuqaro    A. Papenin boshqaruvidagi “VOLVO” rusumli yuk avtomashinasi bojxona nazoratidan o’tkazilganda, unga 17 tonna kishmish navli uzumlar ortilganligi aniqlandi.

    Ma’lum bo’lishicha, A. Papenin fuqaro U. Ro’zimatov bilan til biriktirib, ushbu mahsulotlarni respublikamizdan noqonuniy ravishda olib chiqishni mo’ljallagan ekan.

         Shuni ta’kidlash joizki, bojxona qonunchiligi buzilishining oldini olish maqsadida joylarda o’tkazilayotgan uchrashuvlarda targ’ibot-tashviqot ishlarida qishloq xo’jaligi va oziq-ovqat mahsulotlarining chetga olib chiqilishiga qarshi kurashish borasida chegaradosh mahallalarda yashayotgan fuqarolarning ham alohida o’rni va amaliy yordami borligi aytilmoqda.