Respublikamiz bojxonachilari tomonidan bojxona qonunchiligi buzilishining oldini olish borasida qator chora-tadbirlar amalga oshirilib, qonunbuzarlarga tegishli choralar ko’rilmoqda. 

Yaqinda, Andijon viloyati bojxona boshqarmasi  xodimlari fuqaro   A. Begimqulovaning yuklarini tekshiruvdan o’tkazishganda ushbu ayol umumiy qiymati 1 362 560 so’mlik xorijda ishlab chiqarilgan 1 171 metr to’qimachilik matolari hamda 4452 dona sifati kafolatlanmagan bolalar o’yinchoqlarini yurtimizga noqonuniy ravishda  olib  kirganligi   aniqlandi.

Toshkent viloyatidagi “Oybek” bojxona posti xodimlari qo’shni respublika bilan chegaradosh hududdagi aylanma yo’lda “Gaz 24” rusumli avtomashinanito’xtatib tekshirishganda, unda fuqaro A. Iskandarov qiymati 1650000 so’mlik,xorijda ishlab chiqarilgan,vazni yarim tonnadan ortiqni tashkil etuvchi tovuq go’shti mahsulotlarini respublikamizga noqonuniy ravishda olib kirayotganligi aniqlandi.

Yaqinda Qoraqalpog’iston Respublikasi bojxona boshqarmasi xodimlari “Dushanbe-Moskva” yo’nalishi bo’yicha harkatlanuvchi yo’lovchi poezdini bojxona nazoratidan o’tkazishganda, unda Tojikiston Respublikasi fuqarosi Q. Isamuddinov qiymati qariyb 4,5 million so’mlik 1 tonnadan ziyod pomidor mahsulotlarini noqonuniy ravishda olib ketayotganligi aniqlandi.

“Kamaz-5320” rusumli yuk avtomashinasiga yuklangan qiymati 2 457 000 so’mlik, og’irligi 17,5 tonna  bo’lgan qora metall parchalarini fuqaro  D. Nurov qo’shni respublikaga olib chiqib ketayotganda  Sirdaryo viloyati bojxona boshqarmasi xodimlari uning rejasini chippakka chiqarishdi.

Sirdaryo viloyati bojxona boshqarmasi xodimlari fuqaro B. Jumaev boshqaruvidagi “Gaz-53” rusumli yuk avtomashinasini bojxona nazoratidan o’tkazishganda unga qiymati 2 million so’mdan ortiqni tashkil etuvchi qariyb 4000 litr dizel yoqilg’isi yuklanib, noqonuniy ravishda qo’shni davlatga olib chiqib ketilayotganligi aniqlandi.

         Hozirda yuqoridagi  holatlar yuzasidan surishtiruv harakatlari olib borilmoqda.