Kunlar isigan sari aholining turli sovutgichlarga bo’lgan ehtiyoji ham ortib boradi. Bundan foydalanib mo’may daromad orttirish ilinjidagi ayrim kimsalar esa muzlatgichlarni noqonuniy ravishda yurtimizga olib kirishga urinadilar. Yaqinda bojxonachilar Toshkent viloyatida katta miqdordagi sovutgichlarning yashirincha olib o’tilishiga chek qo’yishdi.

           Davlat raqami 11U7698 bo’lgan “Gaz3302” rusumli yuk avtomashinasi bojxona nazoratidan o’tkazilganda, unga 25 dona “DAEWOO” rusumli sovutgichlar yuklanganligi ma’lum bo’ldi. Haydovchi Sh.Yo’ldoshev qiymati 8 million so’mlik ushbu maishiy texnikalarga tegishli bironta ham hujjjatni bojxonachilarga taqdim qila olmadi. Haydovchining so’zlariga ko’ra, yuk egalari yo’lga o’zimiz javob beramiz deb “Gazel”ni to bojxonachilar tomonidan to’xtatilgunga qadar orqadan kuzatib kelishgan. Ammo, do’ppi tor kelganda esa juftakni rostlab qolishgan.
          “MTZ-80” rusumli tirkamali traktor Andijon viloyatining Paxtaobod tumanidagi aylanma yo’llarda bejiz “adashib” yurmagan ekan. Ushbu transport vositasi bojxonachilar tomonidan to’xtatilib, nazoratdan o’tkazilganda unga tegishli hujjatlari bo’lmagan 27 dona muzlatgich, 118 dona ventilyator va boshqa turdagi mashiy texnikalar ortilgani aniqlandi. Qiymati 10 million so’mdan oshiq bo’lgan ushbu maishiy texnikalarni yurtimizga yashirincha olib kirishga uringan fuqaro Omadjon Raximov omadini sinab qattiq adashdi.