Xonadonimizdagi televizor mabodo buzilib qolgudek bo’lsa, o’zimizni qo’yarga joy topolmay qolamiz. Ayniqsa, sifati kafolatlanmagan televizor egalari bu holatga ko’p tushishadi. Sababi, ko’pchilik televizor xarid qilayotganda, arzon narxga uchishadi-yu, uning sifatiga kafolat beruvchi tegishli hujjatlar bilan qiziqib ko’rishmaydi. Bundan esa televizorlar sadvosi  bilan noqonuniy shug’ullanuvchi kimsalar foydalanib qolishga urinishadi.

          Yaqinda Farg’ona viloyati bojxonachilari va boshqa huquqni muhofaza qiluvchi idoralar xodimlari hamkorligida o’tkazilgan tezkor tadbir davomida ana shunday kimsalar fosh etildi. Farg’ona tumanidagi qo’shni davlat bilan chegaradosh hududdagi aylanma yo’llarda harakatlanayotgan “VAZ-2106” avtomashinasi bojxona nazoratidan o’tkazilganda, unda Xitoyda ishlab chiqarilgan 17 dona “LG” televizorlari borligi ma’lum bo’ldi. Ushbu tovarlarni fuqaro B.Xakimov tegishli hujjatlarsiz yurtimizga olib kirishga uringan ekan.
          Andijon viloyati bojxonachilari ham boshqa huquqni muhofaza qiluvchi idoralar xodimlari bilan hamkorlikda televizorlarni noqonuniy olib kirishga uringan kimsalarning xatti-harakatlarini barataraf etishdi. Paxtaobod tumanidagi aylanma yo’llardan birida chegara simlari ostidan yurtimizga kirishga uringan kimsa huquqni muhofaza qilish xodimlarini ko’rib qolgach, yuklarini ham tashlab, ortiga juftakni rostlab qoladi. Voqea joyi ko’zdan kechirilganda esa, u yerda tegishli hujjatlari bo’lmagan 3 dona “Samsung”  televizorlari qoldirilganligi ma’lum bo’ldi.