Respublikamiz bojxonachilari yurtimiz hududidan qishloq xo’jaligi mahsulotlarining noqonuniy olib o’tilishiga qarshi qator chora-tadbirlarni amalga oshirmoqdalar.

           Yaqinda Sirdaryo viloyati bojxonachilari tegishli hujjatlari bo’lmagan yirik miqdordagi qishloq xo’jaligi mahsulotlari ortilgan yuk mashinalarining yo’lini to’sishdi.
        Xovos tumani hududidagi aylanma yo’llarda harakatlanayotgan “Zil” rusumli yuk avtomashinasi bojxona nazoratidan o’tkazilganda, unda fuqaro J.Norqo’zievga tegishli salkam 4 tonna sabzi qo’shni respublikaga olib ketilayotganligi aniqlandi.
          Fuqaro Z.Jo’raev boshqaruvidagi “Kamaz” bojxona nazoratidan o’tkazilganda, unga tegishli hujjatlari bo’lmagan 13 tonnadan oshiq piyoz yuklangani ma’lum bo’ldi. Qiymati qariyb 11 million so’mlik piyozlarning egasi fuqaro N.Ismoilov ekan.
          Shuningdek, Oqoltin tumani hududida bojxonachilar 2 ta holatda yirik miqdorda ya’ni, har biriga salkam 15 tonnadan piyoz ortilgan “Kamaz”larni to’xtatib qolishdi. Qiymati 24 million so’mga yaqin piyozning egalari U.Shoymardonov va Z.Tohirovlar tegishli hujjatlarsiz yo’lga chiqishgan ekan.
           Aylanma yo’llar orqali qo’shni respublika tomon harakatlanayotgan “Hunday” rusumli avtomashina Andijon viloyati bojxonachilari tomonidan nazoratdan o’tkazildi. Natijada, fuqaro N.Abdurahmonov 2,5 tonna sabzini chetga olib ketilayotganligi ma’lum bo’ldi.