Oshing halol bo’lsa, ko’chada ich, deydi dono xalqimiz. Respublikamizda qishloq xo’jaligi mahsulotlarini eksport-import qilish uchun tadbirkorlarga barcha shart-sharoitlar yaratib berilgan bir paytda ayrim kimsalarning yurtdoshlarimizning rizqini qiyib, qing’ir yo’llardan borishini, noqonuniy xatti-harakatlarini hech ham oqlab bo’lmaydi.

        Yaqinda sirdaryolik bojxonachilar yirik miqdordagi qishloq xo’jaligi mahsulotlarining noqonuniy olib chiqilishiga chek qo’yishdi.  Davlat raqami 12 A 34-75 va 12 I 00-68 bo’lgan “Kamaz”lar chegaradosh hududlardagi aylanma yo’llar orqali qo’shni  davlatga chiqib ketishga uringan paytda bojxonachilar tomonidan  to’xtatib qolindi. O’tkazilgan tekshiruvlar chog’ida, yuk mashinalariga tegishli hujjatlarsiz oz emas, ko’p emas naqd 24 tonna karam yuklangani ma’lum bo’ldi. Qiymati salkam 5 million so’mni tashkil qiluvchi yurtimizda yetishtirilgan ushbu qishloq xo’jaligi mahsulotlari fuqaro Baxtiyor Sodiqovga tegishli ekan.
         Davlat raqami 01 V 978AAbo’lgan“Zil” yuk avtomashinasiga ham salkam 9 tonna anor, mayiz, qurut, pomidor, yong’oq mag’izlari kabi jami 24 xil turdagi qishloq xo’jaligi mahsulotlari va 5 xil turdagi xo’jalik mollari yuklanib, ular yashirin ravishda chetga olib chiqishga mo’ljallangan ekan. Qarang-ki, “Eshagini sug’or-u, pulini ol” qabilida ish tutgan haydovchi Omon To’xtaqulov chinozlik A’zam va O’lmas ismli kishilarning iltimosiga binoan avtomashinasiga  23 million so’mlik yuklarni ortishga ortganu, ammo yuk egalarining shaxsi, hujjatlari bilan yaqindan qiziqib ko’rmagan emish. Yuk egalarining faqat ismlarini bilish bilan kifoyalangan haydovchi yuklarga tegishli hujjatlarning bor-yo’qligiga ham e’tibor bermagan. Oqibatda esa bundan o’zi ham pand yedi xolos.
         Mirzaobod tumanining chegaradosh hududlaridagi aylanma yo’llarda davlat raqami 12Y 3085 bo’lgan “ZIL” yuk mashinasi ham bejizga “adashib” yurmagan ekan. Sababi, sirdaryolik bojxonachilar mazkur yuk mashinasida 4 tonna karam hech qanday hujjatlarsiz olib ketilayotganini aniqlashdi. Fuqaro F.Mamanazarov ushbu qishloq xo’jaligi mahsulotlarini aylanma yo’llar orqali qo’shni respublikaga olib chiqishga uringani ma’lum bo’ldi.
          Buxoro viloyati bojxona boshqarmasi xodimlari boshqa huquqni muhofaza qiluvchi idoralar xodimlari bilan hamkorlikda  2 ta holatda salkam 9 tonna olma kontrabandasiga chek qo’yishdi. Tezkor tadbirlar davomida, davlat raqami “20K1079” bo’lgan “Kamaz”ning safari erta qaridi. Boisi, unga ortilgan 20 million so’mga yaqin qiymatdagi xorijda yetishtirilgan olmalarning tegishli hujjatlari yo’q edi. Yuk egalari buxorolik T.Otaev va R.Irgashevalar noqonuniy hatti-xarakatlari bilan faqatigna o’zlari pand yeyishdi, xolos.
            Navoiy viloyati bojxonachilari esa yirik miqdordagi piyoz kontrabandasiga chek qo’yishdi. Urganch tomon yo’l olgan davlat raqami “22E3294” va “22D9846” bo’lgan “Kamaz” yuk mashinalari bojxona nazoratidan o’tkazilganda, ularga ortilgan 28 tonnadan ortiq piyozning bojxona rasmiylashtiruvini tasdiqlaydigan hujjatlari yo’qligi ma’lum bo’ldi. Yakka tartibdagi tadbirkor E.Normanovga tegishli  ushbu qishloq xo’jaligi mahsulotlarining qiymati salkam 26 million so’mni tashkil qilar ekan.