Respublikamiz bojxonachilari yurtimiz hududi orqali noqonuniy ravishda naqd xorijiy hamda milliy valyutalarni olib o’tilishini oldini olish borasida qator chora-tadbirlarni amalga oshirishmoqda.
         Yaqinda Toshkent xalqaro aeroporti bojxonachilari Istambulga uchib ketayotgan fuqaro D. Boboyorovani bojxona nazoratidan o’tkazishganda, uning qo’l sumkasida bojxona bayonnomasida ko’rsatilmagan 3000 AQSh dollari borligi aniqlandi. Mazkur yo’nalish bo’yicha uchib ketayotgan fuqaro Y. Kasimova esa bojxona bayonnomasida ko’rsatilmagan 5400 AQSh dollari miqdoridagi xorijiy valyutani qo’l yuklari orasiga yashirib qo’ygan ekan.

        «Toshkent-Moskva» yo’nalishi bo’yicha uchib ketayotgan Rossiya fuqarosi Xvan Galinaning ham 2000 AQSh dollari miqdoridagi xorijiy valyuta yurtimizdan noqonuniy olib chiqishga bo’lgan urinishi samarasiz yakun topdi. 
      Andijon viloyati bojxona boshqarmasi xodimlari ham mazkur yo’nalishda qizg’in ish olib borishmoqda. Yaqinda viloyatning “Mingtepa” bojxona posti xodimlari aylanma yo’l orqali Qirg’iziston Respublikasiga chiqib ketmoqchi bo’lgan fuqaro G. Vafoevani to’xtatib uning qo’l yuklarini tekshirishganda, ushbu ayol 2 million 700 ming so’mni  qo’l sumkasi ichiga  yashirgancha qo’shni davlatga otlanganligi ma’lum bo’ldi.
       Viloyat bojxonachilari yana bir holatda aylanma yo’llar orqali qo’shni davlatga chiqishga uringan fuqaro M.Qosimovani to’xtatib uning qo’l yuklarini tekshirishganda, u ham 2 million so’mni noqonuniy olib ketayotganligi oshkor bo’ldi.
        Ma’lumki, amaldagi qonunchilikka muvofiq respublikamiz hududiga cheklanmagan miqdordagi naqd xorijiy valyutalarni olib kirish mumkin. Ammo buning uchun har bir fuqaro o’zi bilan olib kelayotgan valyutani bojxona bayonnomasida ko’rsatishi shart. Bojxona bayonnomasida ko’rsatilmagan valyutalar esa davlat ixtiyoriga o’tkaziladi.
      Yaqinda Toshkent viloyati bojxona boshqarmasining “Navoiy” bojxona posti xodimlari yuqoridagi holatga duch kelishdi. Mazkur post orqali yurtimizga kirib kelgan “Volvo” rusumli avtomashina tekshirilganda fuqaro D.Varonov bojxona bayonnomasida ko’rsatilmagan 3000 AQSh dollari hamda 50ming Rossiya rublini avtoulov saloni ichidagi qo’l sumkasiga yashirib qo’yganligi aniqlandi. “
        Oshing halol bo’lsa ko’chada ich”- deganlaridek, agarda ushbu fuqaro o’zi bilan olib kelayotgan valyutalarni o’rnatilgan tartibda bojxonachilarga ma’lum qilganda so’nggi pushaymonga o’rin qolmasdi.