2003 yilda Prezidentimiz Islom Karimov tashabbuslari bilan tashkil etilgan Markaziy Osiyo mintaqasida yagona Oliy harbiy bojxona institutida hozirgi kunda ana shunday kadrlar tayyorlanmoqda.
        Joriy yilda institut yettinchi bor bojxona xodimi bo’lishni oliy maqsad deb bilgan o’g’il-qizlarni o’z bag’riga qabul qilmoqda.
       Shu munosobat bilan institutda  bojxona ishi va yurisprudensiya mutaxassisliklari bo’yicha qabul qilingan tinglovchilarning  harbiy va bojxonachi qasamyodini qabul qilish marosimi bo’lib o’tdi. UndaParlament, tegishli vazirlik va tashkilotlar, ota-onalar hamda ommaviy axborot vositalari vakillari ishtirok etdi.
        Tadbirda  so’zga chiqqan O’zbekiston faxriylarni ijtimoiy qo’llab-quvvatlash “Nuroniy” jamg’armasi Markaziy Kengashi  Raisi o’rinbosari Shuxrat Usmonov, “Kamolot” yoshlar ijtimoiy harakati Markaziy kengashi Raisi o’rinbosari Odina Jamolidinova, Respublika Ma’naviyat-targ’ibot markazi rahbari Minhojiddin Hojimatov, “Turkiston press” axborot agentligi rahbari Sa’dulla Hakimov, Davlat bojxona qo’mitasi Raisi Sadirxon Nosirov va boshqalar bojxona xizmatining eng muhim mezoni – adolatli bo’lish, qonunlarga og’ishmay amal qilish ekanligini, bojxona xodimidan nafaqat o’z kasbining sirlarini chuqur egallash, balki xalqimiz ma’naviyati hamda oliyjanob axloqiy fazilatlarni o’zida mujassam etishi zarurligini alohida ta’kidlashdi.
        Endilikda institutdagi 11 ta kafedra, ixtisoslashgan dars xonalari, kimyo va kriminalistika laboratoriyalari, amaliy mashg’ulot maydonchalari, shuningdek, ikkita zamonaviy yotoqxona, kutubxonalar, sport majmuasi,  trenajyor zallari, tir, yozgi va qishki suzish havzalari, tennis korti  va boshqa zarur inshootlar ushbu tinglovchilar ixtiyoridadir.
         Shuningdek, oldindagi to’rt yildan iborat tahsil davomida institutning professor-o’qituvchilar jamoasi, jumladan 30 dan ziyodi fan doktori va nomzodi ilmiy daraja va unvonlariga ega ustozlar ularga bojxona sohasidan saboq beradilar. Qolaversa, har o’quv yili yakunida tinglovchilar Davlat bojxona qo’mitasining hududiy bojxona boshqarmalarida malakaviy amaliyot o’tash imkoniyatiga ham egadirlar.
          Yurtimiz bojxonasi – Vatanimiz ostonasidir. Bu ostonaning pokligi, undan yovuz niyatlar va g’arazli kimsalar o’tmasligi ko’p jihatdan bojxonachilarga bog’liq. Bugun qasamyod qabul qilayotgan tinglovchilar ham kelajakda ana shu ma’suliyatni chuqur anglaydigan bojxona xizmatining professional xodimlari bo’lib yetishib chiqishadi.

Davlat bojxona qo’mitasi
Matbuot xizmati