Davlat bojxona qo’mitasi hovlisiga yodgorlik toshi o’rnatilgan. Uning oldida yosh bojxonachilar Vatanga sadoqatli bo’lishga qasamyod qiladilar. Har yili 31 avgustda, butun o’zbek xalqi Vatan uchun halok bo’lganlarni yodga oladigan Xotira va qadrlash kunida bu yerda DBQ shaxsiy tarkibi saf bilan o’tib, bojxona chegaralarini himoya qila turib, jangovor postda halok bo’lganlarni xotirlaydilar. 

       Qizil granit-yodgorlik toshida Saidakbar Najimov, Ravshan Qodirov, Burhon Qo’chqorov, Botir Davlatov, Qo’ldoshali Ro’ziboev, To’xtamish Xolliev, Saidahmad Toshxo’jaev, Alisher Haqqulov, Oybek Qomatov, Amangeldi Kdirov, Shuxrat Inoyatovlarning ismlari o’yib yozilgan.
        Har bir kishining hayotida Vatan, kasb burchi, sha’n, qadr-qimmat singari tushunchalar alohida ma’no bilan yo’g’riladigan payt bo’ladi. O’zbekistonning yuqorida nomlari bitilgan jasur o’g’lonlari Vatan manfaatlariga sadoqatlarini namoyon etdilar, buning evaziga esa mangulikka qadam qo’ydilar.
        Bojxona chegaralarini himoya qilish – qiyin va xavfli ish. Mamlakatimiz shakllangan dastlabki yillarda qo’shni davlatlardagi  murakkab vaziyat tufayli davlat chegarasida bojxona nazorati kuchaytirildi, narkotiklar, qurol-yarog’, o’q-dorilar kontrabandasiga qarshi qaqshatqich kurash bordi. Huquqbuzarlar respublikadan yonilg’i-moylash materiallari, rangli metallar, paxta va boshqa xil tovar-moddiy boyliklarni kontrabanda yo’li bilan olib chiqishga urindilar. Ashaddiy banditlar bilan tengsiz kurashda ayni bojxona xizmatining yuqorida aytilgan 11 nafar jasur zobiti halok bo’lgan.
         Bojxona xodimlarining jasoratlari davlat tomonidan yuksak baholandi. Chunonchi, ular “Shon-sharaf” ordeni “Jasorat” medali bilan mukofotlandilar.
         Bojxona xodimlari halok bo’lgan hamkasblarini unutishmaydi, mamlakat iqtisodiy xavfsizligi himoyachilarining yangi avlodi ular timsolida tarbiyalanmoqda. Ularning oilalari e’tibordan chetda qolmagan -  Davlat bojxona qo’mitasi xizmat postida halok bo’lganlarning ota-onalari, bevalari va farzandlariga doimo yordam berib kelmoqda.
        Xizmat vazifasini bajarish paytida halok bo’lgan bojxona xizmati xodimlaridan biri Qodirov Ravshan Po’latovich edi.  U 1969 yil 16 aprel Samarqand tumaning Sachoq qishlog’ida serfarzand ishchi oilasida dunyoga keldi. Maktabni tugatgan o’n sakkiz yoshli Ravshan tengdoshlari kabi harbiy xizmatga yo’l oldi. Ammo, uning qismatiga harbiy xizmatni Afg’onistonda o’tash yozilgan edi.  Qo’rqmadi, sarosimaga tushib qolgani yo’q, qaytangga jang qildi, hatto jangovar harakatlarning birida jarohatlandi, jasorati uchun taqdirlandi.
        Afg’ondan qaytgan so’nggi askarlar safida unga ham Vatanga omon qaytish baxti nasib etdi. 1993 yilning kuzida esa Ravshan Qodirov Termizdagi bojxona postlarining birida o’z ish faoliyatini boshladi. Hamkasblari orasida yangi xodimning xislatlari darrov ko’zga tashlandi. Istarali, vazmin, ma’suliyatli...
        Bu xususiyatlar bojxona xizmati kichik ispektori Ravshan Qodirovning ishida juda asqotdi. Qo’shni davlat bilan chegaradosh hududlarda bojxona nazoratini olib borishdek murakkab xizmat davomida u xamkasblari bilan ko’plab noqonuniy holatlarga chek qo’yishdi.
        Ravshan Qodirovning bevaqt dunyodan o’tishiga sabab bo’lgan voqea 1994 yilning 3 fevralida sodir bo’ldi. “Gulbaxor” bojxona posti xodimlari tarkibida Ravshan ham chegaradosh hududlardan biridagi tezkor tadbirga yo’l oldi. Bojxonachilar “ZIL” yuk mashinasida chegarani buzib kirishga uringan bir guruh qurollangan jinoyatchilarni to’xtatib qolmoqchi edilar. Sababi, yuk mashinasiga tegishli hujjatlarsiz 4 tonna benzin ortilgan edi. Bojxonachilarga hech qanday hujjatlarni taqdim qilolmagan jinoyatchilar qora qilmshilarini davom ettirmoqchi bo’lishdi. Jinoyatchi haydovchi mashinani o’t oldirdi. Qodirov esa darrov “ZIL” kabinasiga chiqishga urindi. Ammo, kutilmaganda otilgan  o’q atrofni larzaga soldi. 
         ...Jarohatlangan Qodirov o’sha kunning o’zidayoq olamdan o’tdi. U endigina 25 bahorni qarshilagan edi. Savol tug’iladi, 4 tonna benzin jonni qurbon qilishga arzirmidi?  Yo’q, albatta! Biroq, Vatan, xizmaga sadoqat, burch kabi muqaddas tushunchalar borki, ular jon fido qilishga arziydi.
         Vatanimiz mustaqilligining 4 yilligi arafasida Ravshan Qodirov o’limidan so’ng Prezidentimiz farmoniga binoan “Jasorat” medali bilan taqdirlandi.
         U o’zi tug’ilgan Sochaq qishlog’iga dafn etilgan. Yoriga sadoqatli Mavluda ham o’sha qishloqqa ko’chib keldi. Ammo, yolg’iz o’zi emas, erining vafotidan biroz o’tib tug’ilgan o’g’li Yodgorbek bilan. Ayni paytda Mavluda Yo’ldosheva Samarqand viloyatidagi bojxona organlarida ishlamoqda. Xushmuomala, shirinso’z bu ayol ishiga hamisha vijdonan yondoshadi, oilada esa qo’ligul pazanda, farzandiga mehribon ona.
         Ravshanni eslab do’stlari va hamkasblari bu oilaga tez-tez kelib turishadi. Qahramonimizning ochiqko’ngil, mehribon, eng oxirgi noni ham do’stlari bilan birga baham ko’rish kabi ezgu xislatlarini uning Termizdagi xonadonida mehmon bo’lgan qishloqdoshlari hamon eslashadi.
           Yodgorbek bu yil 15 ga to’lmoqda. Onasining aytishicha, ulg’aygan sayin Yodgor tobora otasiga o’xshab bormoqda. Ishqilib, umri o’xshamasin. Kun kelib, kichik Qodirov ham balki, otasi kabi bojxonachilar libosida Vatanimiz iqtisodiy xavfsizligini himoya qilsa, ne ajab?!!

Davlat bojxona qo'mitasi
Matbuot xizmati