Tabiatning eng go’zal hilqati bo’lmish xotin-qizlar yana-da chiroyli va zebo ko’rinish uchun turli xil parfyumeriya vositalaridan foydalanishadi. Shunday ekan bu turdagi mahsulotlarga talab katta. Bundan esa ayrim kimsalar foydalanib qolishga urinishadi.

          Qoraqalpog’istonlik I.Yaganova 46 turdagi 400 donadan oshiq jami 1,5 million so’mlik parfyumeriya mollarini yashirincha olib ketayotgan ekan. “Toshkent-Xazorasp” yo’nalishida harakatlanayotgan “Setra” avtobusi bojxona nazoratidan o’tkazilganda unga 3500 donaga yaqin 8 turdagi kosmetika mahsulotlari yuklanganligi va yashirincha olib ketilayotgan qiymati 3,2 million so’mga yaqin bu mollar fuqaro F.Atamurodovaga tegishli ekanligi ma’lum bo’ldi. 
          Fuqaro G.Jumaeva qiymati 1 million 300 ming so’mdan ortiq 57 turdagi parfyumeriya mahsulotlarini boshqa bir “Setra”ga yuklab,  Buxoroga noqonuniy  olib ketayotgan ekan. 
         Yuqoridagi barcha holatlar Navoiy viloyati bojxonachilari tomonidan aniqlandi.
         Kosmetika va parfyumeriya mahsulotlari kontrabandasida ba’zi erkaklar ham bu ayollardan qolishmas ekan. Sirdaryo viloyati bojxonachilari va boshqa huquqni muhofaza qiluvchi idoralar hamkorligida o’tkazilgan tezkor tadbir davomida fuqaro A.Hakimovning xonadoni belgilangan tartibda ko’zdan kechirildi. Natijada, bu yerda qariyb 100 turdagi 6 ming donadan ziyod atir-upalar yashirincha saqlanayotganligi aniqlandi. “Oriflame” xorijiy kompaniyasi tomonidan ishlab chiqarilgan bu mahsulotlarning umumiy qiymati salkam 30 million so’mni tashkil qilar ekan.
          Jizzaxdan Samarqandga qadar bo’lgan masofani avtomashinada tezda bosib o’tish mumkin. Ammo, fuqaro A.Negmatov “Neksiya”da bo’lishiga qaramay, ana shu yo’lni hadeganda bosib o’tolmadi. U sifat kafolatiga va tegishli hujjatlariga ega bo’lmagan qariyb 1000 dona turli xil parfyumeriya mahsulotlarini olib ketmayotganida yo’lda ushlanib qolmasdi.