Respublikamiz bojxonachilari va boshqa huquqni muhofaza qiluvchi idoralar xodimlari bilan hamkorlikda sifati kafolatlanmagan va tegishli hujjatlari bo’lmagan tamaki mahsulotlarining noqonuniy olib o’tilishiga qarshi tezkor chora-tadbirlar olib borilmoqda. Andijon viloyati bojxona boshqarmasi xodimlari bir necha holatlarda yirik miqdordagi tamaki mahsulotlarining yurtimizga noqonuniy olib kirilishining oldini olishdi.

        Paxtaobod tumanidagi qo’shni davlatga eltuvchi aylanma yo’llarni nazorat qilish jarayonida bojxonachilar chegara simlari yonida izg’ib yurgan shaxsga duch kelishadi. Ammo, kuzatuvga olinganini sezib qolgan kimsa darhol qo’shni davlat hududi tomon juftakni rostlab qoladi. Voqea joyi belgilangan tartibda ko’zdan kechirilganda esa, u yerda 1327 quti “Klasssik” filtrli sigaretlari noqonuniy ravishda yurtimizga olib kirilayotgani ma’lum bo’ldi.
        Xuddi shunday holat “Madaniyat” va “Adir” bojxona posti xodimlari tomonidan ham kuzatildi. Bu gal huquq himoyachilarini ko’rib qolgach, juftakni rostlagan qonunbuzarga 1500 quti sigaretlar “og’irlik” qildi.   Xo’jaobod tumanida qayd etilgan huquqbuzarlik holatida esa bojxonachilarga duch kelgach, qo’shni respublika hududiga qochib ketgan noma’lum fuqaro nafaqat sigaretlar (1570 quti), balki qiymati salkam 6 mln. so’mlik pirotexnika vositalari, kiyim-kechaklar, oyoq kiyimlar va boshqa xo’jalik mollaridan ham voz kechishga majbur bo’ldi.