Pirotexnika vositalarining zararli oqibatlari haqida deyarli har kuni ommaviy axborot vositalari orqali bong urilmoqda. Shunga qaramay, hamon yurtdoshlarimiz hayotini xavfga qo’yib pirotexnika vositalari savdosi orqali mo’may daromadni ko’zlayotgan “tadbirkor”lar uchrab turibdi. Respublikamiz bojxonachilari esa bu turdagi vositalarining noqonuniy olib kirilishiga qarshi chora-tadbirlarni davom ettirishmoqda.

      Farg’onalik bojxonachilar boshqa huquqni muhofaza qiluvchi idoralar vakilari bilan hamkorlikda Beshariq shahri bozorida yashirincha pirotexnika savdosi bilan shug’ullanayotgan M.Juraevning qing’ir qilmishlariga chek qo’yishdi. Huquqbuzarning yonidan 2400 dona “Treniya” nomli 2 kg. og’irlikdagi pirotexnika mahsulotlari olib qo’yildi.
      Qibray tumanidagi aylanma yo’lda Toshkent viloyati bojxonachilariga ko’zi tushib qolgach, qo’shni davlat hududi tomoni juftakni rostlagan huquqbuzardan qolgan yuklar tegishli tartibda ko’zdan kechirildi. Natijada, bu yuklar 6 xildagi 10 kg pirotexnika vositalari ekanligi ma’lum bo’ldi. Yangiyo’l tumanida esa “qochoq” tadbirkordan salkam 22 ming dona, og’irligi esa 27 kg. pirotexnika vositalari “esdalik” bo’lib qoldi. 
       Paxtaobod tumanida ham qonunbuzar tashlab qochishga majbur bo’lgan yuklar orasida 14 kg og’irlikdagi 1610 dona pirotexnika vositalari borligi aniqlandi.
       Sirdaryo viloyati bojxonachilari ham boshqa huquni muhofaza qiluvchi idoralar vakillari bilan hamkorlikda yirik midqordagi pirotexnika vositalarining yashirincha olib kirilishiga chek qo’yishdi. Sirdaryo tumanidagi qo’shni davlat bilan chegaradosh hududda huquq himoyachilarini ko’rib qolgach, juftakni rostlangan kimsaning sim to’siqlar yonida qoldirgan yuklari 83 kg. og’irlikdagi salkam 50 ming dona “Treniya” pirotexnika vositalari ekanligi ma’lum bo’ldi.