Mamlakatimizda valyuta resurslaridan unumli foydalanish, valyuta bozorini yanada rivojlantirish maqsadida izchil islohotlar amalga oshirilayotgan bir paytda naqd xorijiy valyutalarni noqonuniy ravishda olib o’tishga urinayotgan shaxslarning borligi achinarlidir.
        Respublikamiz bojxonachilari naqd xorijiy valyutalarning yurtimiz chegaralari orqali noqonuniy ravishda olib o’tilishining oldini olish borasida qator chora-tadbirlarni amalga oshirishmoqda.

        Qo’shni davlat fuqarosi ye.Bikova yurtimizga kirayotib, Toshkent viloyati bojxonachilariga yonida ortiqcha naqd valyutalar yo’qligini ma’lum qiladi. Ammo, o’tkazilgan bojxona ko’rigi chog’ida kurtkasining cho’ntagida bayonnomada qayd etilmagan salkam 10 ming AQSh dollarini yashirincha yurtimizga olib kirishga uringanligi oshkor bo’ldi.
      Shuningdek, qo’shni respublikaga otlangan Sh.Shakarovning bejo oyoq olishi viloyat bojxonachilarining diqqatini tortdi. Chunki, u paypoqlari orasiga 35 ming 660 AQSh dollarini yashirgancha yurtimizdan olib chiqishni ko’zlagan ekan.
        “Toshkent-Moskva” yo’nalishida poezdda yo’lga chiqqan L. Korotchenko ham safarini qoldirishiga to’g’ri keldi.  Chunki, bu ayol 41 ming AQSh dollarini qo’l sumkasiga yashirgancha, olib chiqib ketishga uringanda Toshkent shahar bojxonachilari tomonidan to’xtatib qolindi.
          Buxoro viloyati bojxonachilari ham yirik miqdordagi naqd horijiy valyutalar kontrabandasiga chek qo’yishdi. “Olot” bojxona kompleksida Qozog’istondan Turkiya tomon harakatlanayotgan “Mersedets-bents” yuk mashinasi  bojxona ko’rigidan o’tkazilganda, uning saloniga oz emas, ko’p emas naqd 56 ming AQSh dollaridan ziyod valyutalar yashirilganligi ayon bo’ldi. Avtoulov haydovchisi horijlik O.O’zdemir bu pullarni noqonuniy tarzda yurtimizdan olib chiqmoqchi bo’lgan ekan.