Respublikamiz bojxonachilari naqd xorijiy valyutalar va zargarlik buyumlarining yurtimiz chegaralari orqali noqonuniy ravishda olib o’tilishining oldini olish borasida qator chora-tadbirlarni amalga oshirishmoqda.

           Qirg’iziston fuqarosi B.Yuldashev aylanma yo’llardan yursada baribir bojxonachilarga duch keldi. Uning egri yo’lni tanlashiga «egri» sabablar bor edi. U to’xtatilib tekshirilganda, o’zi bilan 5100 AQSh dollari, 16 ming qirg’iz somi va 105 ming milliy valyutamiz - so’mni yashirincha olib chiqib ketishga uringan ekan.
           Fuqaro F.Yuldoshev ham Samarqand aeroportida ko’zlagan rejasini yakuniga yetkaza olmadi. Xorijdan uchib kelgan ushbu shaxs bojxonachilar ko’zini shamg’alat qilib, 9400 AQSh dollarini bayonnomada ko’rsatmasdan, osongina olib o’taman deb o’ylagan edi. Ammo, u qo’llagan nayrang bojxonachilarga o’tmadi.
           Rossiyaga uchishga otlangan Sh.Gulxarov va B.Abraevlarning “tadbir”lari esa bir xil yakun topdi. Toshkent xalqaro aeroporti bojxonachilari ularni jami  95 500 rossiya rublini bayonnomada ko’rsatmasdan olib chiqishga uringanlarida to’xatib qolishdi.
           Toshkent viloyati bojxona boshqarmasi xodimlari tomonidan o’tkazilgan tadbir davomida aylanma yo’llarda “adashib yurgan” U. Kalikulova to’xtatilib bojxona nazoratidan o’tkazildi. Natijada u 3 ming AQSh dollari hamda qiymati 2 million 250 ming so’mdan oshadigan, og’irligi 65 grammga yaqin 10 dona taqinchoqlarni qo’shni respublikaga yashirincha olib chiqishga uringanligi aniqlandi. 
            Hozirda yuqoridagi qonunbuzarlik holatlari yuzasidan surishitiruv ishlari olib borilmoqda.