Samarqandviloyati bojxonaboshqarmasi hamda boshqa huquqni muhofaza etuvchi idoralar xodimlarining birgalikda o’tkazgan reydlari natijasida katta miqdordagi turli tovar-moddiy boyliklar kontrabandasiga chek qo’yildi. Xususan, Bulung’ur tumanida “KaMAZ” rusumliyuk avtomashinasi to’xtatib tekshirilganda, unda fuqaro A.Qurbonovga tegishli salkam 1,5 ming dona chet elda ishlab chiqarilgan turli lampalar va yoritish moslamalari hech qanday hujjatlarsiz olib ketilayotgan ekan. Aniqlanishicha, ushbu tovarlarning qiymati salkam 8,5 mln. so’mni tashkil qiladi.
       Yana bir qonunbuzarlik holatida esa salkam 19 mln. so’mlik tovar-moddiy boyliklarning noqonuniy olib ketilayotganligi fosh etildi. Samarqand shahridagi tezkor tadbirlar chog’ida  bojxona tekshiruvidan o’tkazilgan “KaMAZ”da 12 turdagi 40 ming donadan oshiq mebel uchun zarur anjomlar, butlovchi qismlar fuqaro Sh.Bekmurodov tomonidan tegishli hujjatlarsiz olib ketilayotgan ekan.
           Xovos tumanidagi aylanma yo’lda turnaqator bo’lib kelayotgan 3 ta   “Vaz-21” avtomobillari sirdaryolik bojxonachilar diqqatini tortdi. Avtoulovlar to’xtatilib tekshirilganda esa bojxona rasmiylashtiruvidan o’tkazilganligini tasdiqlovchi hujjatlari bo’lmagan, xorijda ishlab chiqarilgan 3700 donadan ortiq chinni idishlar fuqaro X. Bobokalonov tomonidan yashirincha olib ketilayotganligi ayon bo’ldi.
         Farg’onalik bojxonachilar va boshqa huquqni muhofaza etish xodimlari tomonidan Beshariq tumanidagi ba’zi xonadonlar amaldagi tartiblarga binoan ko’zdan kechirilganda ayrim fuqarolarning qonunga zid faoliyat yuritayotgani fosh bo’ldi. Jumladan, X.Davronovning uyidan qo’shni Tojikistondan yashirin yo’llar bilan olib o’tilgan salkam 9 mln. so’m qiymatdagi pamperslar va oyoq kiyimlari topildi.
         Xo’jaobodlik B.Yoqubovning “biznesi” oldida esa bular holva. Andijon viloyati bojxona boshqarmasi xodimlari va boshqa huquqni muhofaza etuvchi idoralar vakillari bilan hamkorlikda ushbu fuqaroning xonadoni qonunchilikda belgilangan tartibda ko’zdan kechirilganda oz emas, ko’p emas 39 mln. so’mlik 54 ming donaga yaqin turli xo’jalik mollari va kiyim-kechaklar borligi aniqlandi.
        Nafs domiga tushib, vijdonni jig’ildonga alishgan bu kimsalar endi qonun oldida javob beradilar.